محمود المليجي كان النجم الوحيد اللي عمل ٧٥٠ فيلم فكان بالشهر بيعمل اربع خمس افلام فكان لما يضيق عليه الخناق قوي المنتجين والمخرجين طالبينه كان دايماً يرشحني للادوار الفائضة من محمود المليجي يعني يقولهم في ولد جديد طالع اسمه فريد شوقي ابن حلال و رخيص و كويس هيأدي اللي انتوا عاوزينه بالضبط فكنت باخد ادواره فكنت باخد ادوار الفائضة الكثيرة من محمود المليجي،، و اشتغلت معاه كتير قوي لغاية ما انا جيت سنة ١٩٥٢ و اردت ان اغير دفة حياتي و ابتديت انتج و كان اول فيلم من انتاجي الاسطى حسن و عدد الافلام اللي انتجتهم الى الآن ٣٥ فيلم يمكن محمود المليجي مشترك معايا في ٢٥ فيلم منهم، ليه؟ لأن كان الموزع زمان او شباك التذاكر يتطلب وجود في الفيلم فريد شوقي و محمود المليجي يمكن ماكانوش بيسألوا مين البطلة معانا كنت انا وهو بنكمل بعض دايماً في جميع افلامنا و افلامنا لاقت نجاح كبير جداً سواء فني او مادي او تجاري و اشتهرنا مع بعض و كنا ملازمين بعض مدى الحياة لدرجة ان انا هنا مكتبي في ٢٦ ش؛شريف هو مكتبه معايا في نفس العمارة و في نفس الدور فكنا دايماً نلتقي عالسلم نلتقي في الاستوديو نلتقي في الاسانسير و في المكتب و في كل مكان كنا نقعد نتكلم عن السينما و الفن و الممثلين كتير قوي الا ان محمود المليجي كان منطوي على نفسه و كان خجول هذا العملاق اللي كنا بنشوفه جبار في الشاشة كان خجول ومهذب جداً يعني لا يجرؤ و لا يستطيع عمري ماشفته شتم حد او طول لسانه على حد عكس اخلاقه في السينما و قد يظن الجمهور او المشاهدين ان انا ومحمود المليجي على خلاف كما يحدث في الافلام اننا يعني كنا بنضرب بعض او بنتخانق مع بعض الافكار دي كانت ناجحة في ذلك الوقت الا اننا كنا في الحقيقة من اعز الاصدقاء، كان نفسي محمود المليجي رحمه الله يشوف ازاي فضل عالقمة حتى بعد وفاته محمود المليجي اللي عمل فيلم الارض اللي قال فيه انه شبع تمثيل لذلك كُتِب عنه في جرايد العالم كلها قالوا ان في فنان في مصر اسمه محمود المليجي اثبت وجوده وقف قصاد اي ممثل امريكي او انجليزي كان فخر،، محمود المليجي لا يُعَوض.
الفنان الجميل فريد شوقي مُتحدثاً عن صديقه الفنان الرائع محمود المليجي رحمهما الله و غفر لهما
SU
الإثنين مايو 08, 2023 9:24 pm